ALTUM-VILLARE vel ALTUS-VILLARIS

ALTUM-VILLARE, vel ALTUS-VILLARIS

locus et Monasterium Galliae, ad flumen Matronam, inter Sparnacum et Castellionem. Cuius auctor Nivardus fuit Remorum Antistes, circa A. C. 670. illudque Berchamo Abbati, cum Basilica B. Petri, multisque praediis suis donavit, ubi ipse Monachique eius ex praescripto Columbani viverent, teste Frodoardô. Adso etiam auctor est, Bercharium, Childericô Francorum Rege ac Nivardô Episcopô adiuvantibus, in Alto-villari Coenobium, in latere montis, duasque Basilicas condidisse, quae a Nivardo, praesentibus provinciae Optimatibus ac Antistitibus, sint dedicatae. Vulgo Haut-villers, vel Auvilliers. Vide Hadr. Vales. Notit. Gall.